COMPANG-CAMPING PANÊTÊPAN UKUM ING NÊGRI KINASIH

   kapacak uga ing https://www.facebook.com/share/p/1BkSTiRfoj/

Ing nêgri kang kitå sêbut ibu pêrtiwi

kaadilan isih dadi pandongå kinucap lirih

ing jroning rindhung-riwud kamar sidhang.

Traju ukum ngadêg pidėkså

nanging kålåmångså kråså goyang.

Dudu mêrgå wêsine krõpõs

nanging mêrgå tangan manungså

ora tansah têguh ngugêmi osiking nålå.

Kang kalêbu gõlõngan cilik

asring lumayu ngoyak kaadilan.

Dene kang roså lan kwåså

kadhangkålå sakêpenake mlangkah luwih ènthèng.

Rakyat hamung biså pitakõn,

"Apå iyå ukum isih dadi pangayõm sanggyaning umat?"

Lêmbaran paugêran endah sinawang

bab twin pasal rinakit sarwå bêcik.

Nanging ing marganing urip

aksårå dalah ukårå kålå-kålå kelangan makna ora têgês,

nalikå kapêntingan luwih ngumandhang katandhing kayêktèn.

He..... nêgri kang daktrêsnani

aku ora nyêngiti ukum.

Malah aku ngeman lan nrêsnani

mêrgå ukum kang adil

minångkå dhêdhasaring såkå kang nyånggå lêstarine bångså.

Mugyå dinå iku tumêkå

nalikå hakim nuthukake palu

dudu mêrgå dhêsêkan

dudu mêrgå kêkuwatan

dudu mêrgå kakuwasaan,

ananging mung jalaran råså kaadilan lan kayêktèn.

Sabab nêgri iki datan kêkurangan wõng pintêr

kang kabutuhake mung ati kang jujur,

patrap suranggåkårå kang têguh

lan osiking nålå kang nora biså didõl-tinuku.

Kasêdyå, ing têmbe anak putu ujar:

"Ing nêgri iki, ukum bênêr-bênêr dadi pangayõm,

dudu amung tulisan,

nanging mujudake pêpajar sabên  warganing rakyat."

Sumånggå, kita sêngkuyung

lumakuning panêtêpan ukum bênêr-bênêr gawe tentrêm,

nora mung minångkå ngimpi

nanging bênêr-bênêr kasunyatan 

winujude pangarêp-arêping sanggyaning wargâ nêgri tumujwèng Indonesia Êmas kang kitå trêsnani iki.

~ lingsir wêngi, 22726 ~

            ✍️ 𝖊𝕹𝕻𝖊 ✍️

            [^__^]  [^__^]