RAPAT RT NGREMBUG SAMPAH (uwuh, larahan)

   kapacak uga ing https://www.facebook.com/share/p/18EkXECRpR/

Ing Bale Kampung, sakumpulan warga sawijining kampung lagi padha jagongan.

Pak RT : "Ibu-Bapak, sugêng sõntên. Matur nuwun rawuhe. Kitå nglêmpak ing ngriki saprêlu ngrêmbag satunggaling bab kang saya dangu saya awrat, bõtên sanès bab SAMPAH (larahan, uwuh) ing tlatah padunungan kitå."

Bu Sari: "Blåkå mawõn pak RT, ngajêng griyå kulå saniki mambêt sangêt Pak! Larahan numpuk dugi kalènan."

Pak Joko : "Iyå bênêr! Wingène wanci jawah dêrês, toyå ngantõs mbludak, kalènan mampêt khathah sampah plastik lan sterofoam nyumpêl."

Bu Rina ngimbuhi: "Sing nyêdhihke mêlih, saperangan sampah dibucal sêmbarangan dening wargå piyambak, kamångkå tong sampah punèntên."

Pak Agus: "Bõtên namung mambu mawõn, lare-lare sami watuk lan gatêlên. Kulå kuwatõs mangke ndadèke sêsakit pak RT."

Mangkono kira-kira ramene rembugan sore iku.

Pak RT sawise krungu wadulane para warga, nuli clathu: "Kulå ugi nampi lapuran, èntên wargå njaban kampung kitå, bucal larahan dalu-dalu ing ngriki. Nanging pripun jal yèn kitå piyambak dèrèng têrtib, angèl ajêng mênging tiyang sanès."

Kabeh padha cep klakep datan sabawa sawetara wektu.🫡🫣

Banjur ana sing nyauti, Bu Sari sing rada 'vokal' : "Mênåwå kênå usul, kitå prêlu jadwal angkut sing gênah. Saniki kan kadhang rõng dinå pisan, kadhang têlung dinå pisan nêmbe diangkut!"

Pak Joko: "Sêtuju! Sarujuk! Mênawi sagêd dipilah riyin, sampah plastik kalih sampah organik dipisah. Ampun di campur!"

Bu Rina ngimbuhi: "Nèk pêrlu èntên sangsine niku, bõtên kangge ngukum ning kangge 'pêlajaran', bèn sami kapõk. Nèk diêjarne, kampung kitå sagêd dadi nggên pambuwangan sampah!"

Pak Agus: "Kêrja bakti gõtõng rõyõng prêlu niku. Ampun ngantõs ngåmbrå-åmbrå nêmbe umyêk."

Cecaturan wawan rembug sangsaya rame, kabeh warga padha unêg-unêg urun rembug aweh gagasan werna-werna. Ya kaya ngono iku sing diarani demokrasi nadyan wengkone cilik.

Ora maido bab sampah sacara nasional dadi prekara kang ora bisa dianggep remeh. Nganti dadi kawigatene Presiden nalika ana pepanggihan kepala-kepala Dhaerah lan Pamarintah Pusat.

Pak RT njur gawe ringkesan:

"Lha nggih pun, kacathêt ringkêse : 

a. kitå prêlu têrtib buwang sampah

b. galake mêlih gõtõng rõyõng

c. têtêpke jadwal angkut sing pêsthi

d. damêl 'têguran' sing nglanggar botên kenå protès." ✍️👍

Bu Sari isih nyauti meneh:

"Mugå dudu mung rapat mawon dintên niki, Pak. Lingkungan rêsik niku tanggêl jawab kitå sami. .....Hidup pak RT! ....Hidup kampung kitå!" ✊️

Sambunge pak RT: "Lêrês Bu. Mênawi sanès kitå kang prêduli, sintên malih jal?"

Mungkasi ketemuan,  pak RT nuthuk meja, "Rapat ditutup!" ....dhog.. dhog..!🔨🔨

Kabeh warga padha salam-salaman, mulih sowang-sowang karo nggawa pikiran dhewe-dhewe.🤝

Rahayu samya pinanggih

Sugeng ngayahi jejibahan.

JM, sirep bocah, 12226

          ✍️ 𝖊𝕹𝕻𝖊 ✍️

          [^__^]  [^__^]