BEBASAN

BEBASAN yaiku tetembungan gumathok, ngemu surasa pepindhan kang dipindhanake solah bawa (sikap Ind.).

Tuladha :

· Njagakake endhoge si blorok, tegese nunggu / ngarep-ngarep samubarang sing durung mesthi.

· Anak polah bapa kepradah, tegese wong tuwa nemu reribed kawusanan polahe/tingkahe anake.

· Adigang , adigung, adiguna, tegese ngendelake kakuwatane, kaluhurane, lan kapinterane.

· Car-cor kaya kurang janganan, tegese guneman waton metu tanpa dipikir dhisik.

· Dipalangana mlumpat, ditalenana medhot, tegese yen wis tinakdir (jodho), kaya ngapaa mesthi bakal kelakon (dadi).

· Diwenehi ati ngrogoh rempela, tegese nyenyuwun, wis diparingi sathithik, ndadak nyuwun sing akeh.

· Durung becus / pecus kaselak besus, tegese durung sembada wis kepengin sing ora-ora.

· Emban cindhe emban siladan, tegese siji lan sijine ora padha pangrengkuhe (ora adil).

· Embat-embat celarat, tegese nyambut gawe klawan ngati-ati banget.

· Kakehan gludhug kurang udan, tegese akeh omong, nanging ora ana nyatane.

· Keplok ora tombok, tegese melu seneng-seneng nanging ora gelem cucul wragad.

· Kerot ora duwe untu, tegese duwe kekarepan nanging ora duwe wragad.

· Kriwikan dadi grojogan, tegese prakara cilik dadi gedhe.

· Lambe satumang kari samerang, tegese aweh pitutur bola-bali, nanging ora digugu.

· Nabok nyilih tangan, nindakake panggawean ala sarana kongkonan.

· Ngalem legining gula, tegese nyebut kaluwihane , kapinterane, utawa kasugihane wong.

· Nglungguhi klasa gumelar, tegese kari nemu kepenake, tanpa melu rakasane.

· Nguyahi segara, tegese weweh marang wong sugih, tiwas tuwas.

· Satru mungging cangklakan, tegese mungsuh kang isih sanak sadulur.

· Sembur-sembur adas, siram-siram bayem, tegese bisa kaleksanan marga pandongane wong akeh.

JM, lingsir wengi, 230622

dening eNPe

(kinlumpukake saka sawernaning cathetan)