KASANGSARAN KANG NYLAMETAKE

-

   kapacak uga ing https://www.facebook.com/share/p/1AALoAjYu6/

Berkahing Gusti kababar lan katetepake tumraping umat abdi-Ne kang setya tuhu ngestokake dhawuh karsa-Ne lan angasihi Panjenengane.

Nanging, nalika umat-E mbalela ora setya, bebendu bakal kang tinampa. Bebendune Gusti Allah kang ngampiri bisa awujud lelara, lemah kasatan garing utawa kabenan, pageblug, angin lesus lan prahara-prahara liyane.


Kasangsaran kang luwih gedhe bakal tumanduk maring praumat abdi-Ne yen nganti terus nglirwakake dhawuhe Gusti lan ora nedya mratobat. Gusti Allah bakal musnakake kasantosane, umuk gumunggunge, wangkot atine lan apa bae kang dadi agul-agule manungsa dadi blasar sakarepe dhewe ngliwar saka dalan kabenerane Gusti.


Kasangsaran, kasekengan pancen bisa andadekake salah siji carane Gusti nibakake paukuman tumraping dosa-dosa kita manungsa umat-E Gusti. Mulane iku rikala kita ana ing sajroning kasangsaran, sumangga kita tumungkul kanthi meneping nala ngresepi uriping kita nyuwun panuntun, apa kita wus ngupaya urip bener lan angasihi Gusti? Apa kita lagi urip ing pamblithuking dosa lan ninggalake Gusti? Lamun kita setya tuhu mring Gusti, aja ngejarake iblis njlomprongake ing dalan palimengan. Enggala kita sumungku nyadhong pangapurane Gusti nyuwun kaentasake saka pamblenggune kwasa dosa temahan ninggalake tumindak dosa.


Tumusing dosa bokmenawa ora katon terwaca, nanging iku ora ateges Gusti Allah ora ngawikani lan ora ngarsakake tanggung jawab kita. Aja nganti kita duwe pamikiran yen Gusti wus ndhesek kita, lagi kita gelem mratobat. Iya, aja nganti iku dumadi kaya mangkono.


Pranyata, aruh-aruhan, ukuman malah kasangsaran kang kita tampa dudu lan ora kanggo ngrusak urip kita, nanging sejatine Gusti ngersakake anylametake kanthi mbereg urip kita klawan nglebur dosa kita awit kawilujengan sejati amung kagungane Gusti, karahayon sajati amung ana ing Panjenengane kang akarya gesang. Panjenengane iku Maha Asih, nedya amberkahi kita, nanging iku ora bakal dumadi yen kita isih begegeg ana ing urip pamblithuking dosa.

Mratobata, lan aja kapirangu bali marek sumungku mring Panjenengane. Gusti Allah tansah ngawengakake korining pamratobat tumraping kita umat kinasihe.


Mugya rahayu kang tinemu

sarwa kabagyan kang dinadyan

bagas saras kang linaras

Gusti amberkahi.... Aaa_aamin A__aamin 🙏🙏


JM, madya raina, 17425

          ✍️ 𝖊𝕹𝕻𝖊 ✍️

          [^__^] [^__^]


Komentar

Posting Komentar

Postingan populer dari blog ini

PANGAJENG-AJENGING MASARAKAT WONG CILIK

-
  kapacak ugi ing  https://www.facebook.com/share/p/itD6xxVSXCPFr2Jf/?mibextid=oFDknk    - nawala tinarbuka lan nitip pesen katur para pemimpin- Pangajeng-ajenging masarakat wong cilik kagem sinten kemawon kang bakal nampi panetepan lan pangukuhan dados jejering pemimpin, menteri, pamong praja lan pandhegane pamarentahan sanesipun. Salam rahayu 🙏 Demi karsaning Gusti, samya nuhoni lan mbangun turuta dhateng sedhengah tata pamarentahan ingkang adhedhasar paugeran, undhang-undhang kang lumampah lan kaanut. - Maring pamong dalah sadaya ingkang sampun kapiji dados pandheganing pamarentahan, dadosa kang ngasta panguwaos kanthi wasis wicaksana ngayahi darmaning negari tumuju kamakmuraning bangsa. - Maring para gubernur, bupati walikota dalah para pamong praja, dadosa kang anggadhahi kuwaos netepi ngadili tetiyang kang samya anglampahi piawon, lan ngajenana tetiyang kang adamel kabecikan, sumimpanga saking pilih asih! - Samya gesanga kadya tiyang mardika, nanging sampun ng...
Baca selengkapnya

🎶 ISIH DUWE WÊKTU 🎶 𝕰𝖇𝖎𝖊𝖙 𝕲. 𝕬𝖉𝖊

-
    kapacak uga ing  https://www.facebook.com/share/D1XWgkW1by24K76b/?mibextid=oFDknk Lamun isih tan mokal kitå anggurit batin minångkå sêsulihing jiwå lan nålå tulus eklas. Mupung isih duwe wêwêngan tumrap kitå nglumpuke sanguning margålenå ing ngalam kalanggêngan. Kitå têmtu emut kasangsaran kang ngrêrujit ati kênåpå kudu pårå kadang kang kapilih marak? Têmtu ånå hikmah kang biså kitå pêthik minångkå wakiling jiwå payo ngêningake ciptå.   Kitå kudu muji sokur dene isih pinaringan wêktu êmbuh nganti kapan ora ånå sing biså ngetung. Mung margå Sih katrêsnan dalah keparênge Gusti kitå isih biså nyawang sang suryå. Marang sukêt alang-alang dalah lintang  kitå biså nyobå nyilih cathêtan-E. Tumêkèng nganti kapan  wêktu kang isih kèri iki? Kabèh gèlèng-gèlèng, kabèh cêp klakêp kabèh mangsuli ora ngrêti. Kang prayogå hamung enggalå mangèstupådå mupung kitå isih kasinungan wêktu. Sõrõgan :  nyobi njarwakakên saking syair 🎶 têmbangipun Ebiet G Ade, bilih kath...
Baca selengkapnya

KEDUWUNG TANSAH KASUMURUPAN SAWUSÉ KADADEAN

-
    kapacak uga ing   https://www.facebook.com/share/p/ryB5ASdz7LjGWa62/?mibextid=oFDknk Ing sawijining kutha cilik ana piyayi sarimbit nembé nampa kanugrahan pinaringan momongan putra umuré lagi setahun. Kejaba iku duwé ingon-ingon kéwan asu Hèrdher kang banget setya sing wus suwé diingu wiwit isih srawung kekancan pepacangan. Kéwan ingon2 mau bisa sinebut minangka "Piyaraan", "Rowang dolanan", "Tukang Jaga & Pangayoming Kaluwarga". Piyayi sarimbit mau banget olèhé gemati lan pracaya mring Hèrdher-é iku. Sawijining dina piyayi sarimbit mau lagi tindakan kanthi ninggalaké putrané hamung dikancani si Hèrdher awit saking dipracaya. Tan kinira nalika piyayi sakloron mulih... iba kagèté! ... jalaran nyumurupi ana tumètèsé getih ing jogan. Sanalika lagi kèlingan yèn lali nora nyepakaké pakan kanggo si hèrdher-é mau. Kagèt, tratapan lan kuwatir campur adhuk rasané ing pikirané sakloron. Tanpa mikir werna-werna jenggirat tumuju kamar. Ing ngarep lawang katon ...
Baca selengkapnya